Catullus 58, 69, 77, 100 (Poems about Caelius)

Catullus 58 (hendecasyllables)

Caelī, Lesbia nostra, Lesbia illa,

illa Lesbia, quam Catullus unam

plūs quam sē atque suōs amāvit omnēs,

nunc in quadriviīs et angiportīs

glūbit magnanimī Remī nepōtēs.

Catullus 69 (elegiac couplets)

Noli admirari, quare tibi femina nulla,

     Rufe, velit tenerum supposuisse femur,

non si illam rarae labefactes munere vestis

      aut perluciduli deliciis lapidis.

laedit te quaedam mala fabula, qua tibi fertur

      valle sub alarum trux habitare caper.

hunc metuunt omnes. neque mirum: nam mala valdest

     bestia, nec quicum bella puella cubet.

quare aut crudelem nasorum interfice pestem

     aut admirari desine cur fugiunt.

Catullus 77 (elegiac couplets)

Rufe mihi frustra ac nequiquam credite amico

     (frustra? immo magno cum pretio atque malo),

sicine subrepsti mi, atque intestina perurens

     ei misero eripuisti omnia nostra bona?

eripuisti, eheu nostrae crudele venenum

     vitae, eheu nostrae pestis amicitiae.

Catullus 100 (elegiac couplets)

Caelius Aufillenum et Quintius Aufillenam

     flos Veronensum depereunt iuvenum,

hic fratrem, ille sororem. hoc est, quod dicitur, illud

     fraternum vere dulce sodalicium.

cui faveam potius? Caeli, tibi: nam tua nobis

     perspectast igni tum1 unica amicitia,

cum vesana meas torreret flamma medullas.

     sis felix, Caeli, sis in amore potens.